2019 წლის 4-8 სექტემბერს სან-ფრანცისკოში, ამერიკის შეერთებულ შტატებში, სტომატოლოგთა მსოფლიო ფედერაციის (FDI) და ამერიკის სტომატოლოგთა ასოციაციის (ADA) ერთობლივი მსოფლიო კონგრესი ჩატარდა.
ADA და FDI ერთობლივად 1 მილიონ სტომატოლოგს წარმოადგენს მსოფლიოს 130 ქვეყნიდან.
სტომატოლოგთა მსოფლიო ფედერაციის გენერალურ ასამბლეის მუშაობაში ჩართულები იყვნენ დელეგატები საქართველოდანაც. საქართველოს სტომატოლოგთა ასოციაციას, როგორც FDI-ს წევრ ასოციაციას, FDI-ს მმართველ ორგანოში ორი დელეგატი (ასოციაციის პრეზიდენტი, თსუ-ის პროფესორი ქეთევან გოგილაშვილი და ასოციაციის გენერალური მდივანი, პროფესორი ვლადიმერ მარგველაშვილი) ჰყავს.
გენერალურ ასამბლეაზე მოხდა მნიშვნელოვანი გაიდლაინების დამტკიცება (კარიესული დაზიანებები და პირველი რესტავრაციული მკურნალობა; დაზიანებული რესტავრაციების აღდგენა; ანტიბიოტიკებით მკურნალობა სტომატოლოგიურ პრაქტიკაში; კბილთა მწკრივის ანომალია და პირის ღრუს ჯანმრთელობა; უწყვეტი სტომატოლოგიური განათლება ციფრული მედიის საშუალებით; ინფექციების პრევენცია და კონტროლი სტომატოლოგიურ პრაქტიკაში) და ახალი კანონების მიღება.
პროფესორი ქეთევნ გოგილაშვილი მეორე ვადით იქნა არჩეული FDI-ს ქალთა ორგნიზაციის გამგეობაში (Women Dentists Worldwide – WDW). ქეთევან გოგილაშვილი WDW-ს ფორუმზე წარსდგა მოხსენებით ქალთა ეკონომიკური და პოლიტიკური გაძლიერების საკითხებზე.
Free Communication სექციაში მოხსენებებით წარსდგნენ პროფესორი ვლადიმერ მარგველაშვილი და საქართველოს სტომატოლოგთა ასოციაციის ვიცე-პრეზიდენტი, თბილისის სახელმწიფო უნივერსიტეტის დოქტორანტი ზურაბ ალხანიშვილი (თანაავტორები: ირმა ბაკურაძე, ქეთევან გოგილაშვილი, ნინო გვასალია, მაგდა ასათიანი, გვანცა ტაბაღუა, ლანდა ლურსმანაშვილი). თსუ-ის დოქტორანტის, გვანცა ტაბაღუას, ავტორობით წარდგენილი იქნა ელექტრონული პოსტერი „ახალი თაობის ორალური კონტრაცეპტივების გავლენა პაროდონტის მდგომარეობაზე“ (თანაავტორები: ქეთევან გოგილაშვილი, ლანდა ლურსმანაშვილი, ზურაბ ალხანიშვილი, ირაკლი ბერიძე, ნინო გვასალია).
კონგრესს ათეულობით ათასი მონაწილე ესწრებოდა მსოფლიოს სხვადასხვა კუთხიდან. საქართველოდან მონაწილეობას ღებულობდნენ როგორც სტუდენტები და რეზიდენტები, ისე ექიმი სტომატოლოგები.
