დაინტერესებულმა ადამიანმა სად შეიძლება მოიძიოს ინფორმაცია მოგროვილ ქულებზე? სამინისტროს ექნება პორტალი სადაც პირადი მონაცემების მიხედვით მოიძიებს ექიმი ინფორმაციას?
რეგულირების სააგენტოს აქვს ცალკეული პროგრამის განმახორციელებლებისგან მიწოდებული მონაცემები ჩატარებული პროგრამებისა და მონაწილე პირების შესახებ, თუმცა ერთიანი საინფორმაციო ბაზა ამ ეტაპზე შექმნილი არ არის.
ექიმებს და კლინიკებს თავად აქვთ ვალდებულება შეაგროვონ ინფორმაცია საკუთარი (კლინიკის შემთხვევაში – კლინიკის ექიმების) ქულების შესახებ. საუკეთესო პრაქტიკას წარმოადგენს კლინიკაში მონაცემთა ბაზის გაკეთება, რომელიც განახლდება პერიოდულად და შესაძლებელი იქნება კონტროლი და მონიტორინგი.
პროგრამის აკრედიტაციის ნომერი, თარიღი და მინიჭებული უპგ ქულის ოდენობა მითითებული უნდა იყოს სერტიფიკატზე. პროგრამის შესახებ (მაგ. ქულების ოდენობა) დამატებითი ინფორმაციის გამოთხოვა შესაძლებელია პროგრამის განმახორციელებელი ორგანიზაციიდან.
ერთიანი საინფორმაციო სისტემის შემუშავება უახლოეს პერიოდში არ იგეგმება.
ზოგად-პროფილური 2 კურსის გავლით მოგროვებული ქულებით, შეიძლება პრობლემა შეექმნას სტომატოლოგს? მაგ. პირველადი დახმარების და ინფექციების პრევციისა და კონტროლის ტრენინგით?
არა, ვინაიდან არსებული კანონმდებლობა, ამ ეტაპზე, არ განსაზღვრავს პროგრამის ვიწრო შინაარსს. თუმცა, რეგულაცია მიზნად ისახავს უწყვეტი სამედიცინო განათლების პროგრამებში ექიმების მონაწილეობასა და საკუთარ სპეციალობაში ახალი ცოდნის მიღებას, შესაბამისად, სასურველია, ვიწრო სპეციალიზებული კურსების გავლაც.
ერთი და იგივე ტრენინგი ყოველ წელს შეიძლება გაიაროს ექიმმა?
შესაძლებელია. აკრედიტებულ პროგრამებს განსაზღვრული აქვს ვადა, რის შემდეგაც პროგრამის შინაარსი ახლდება. გარდა ამისა, არის საკითხები, რომელთა ყოველწლიურად გავლა და ცოდნის გაახლება რეკომენდებულია, როგორიცაა პირველადი დახმარება, ინფექციების პრევენცია და კონტროლი და სხვ.
თუ დეკრეტული შვებულების დროს ქულების დაგროვება ვერ მოხდება, საპატიოდ ითვლება?
ამ ეტაპზე ეს საკითხი რეგულირებული არაა. საქართველოს სტომატოლოგთა ასოციაცია თანამშრომლობს ჯანდაცვის სამინისტროსთან აღნიშნულთან დაკავშირებით და პროცესის საკანონმდებლო ჩარჩოში მოქცევამდე დეკრეტული შვებულებით მოსარგებლე პირებს პრობლემა არ შეექმნებათ. ამისთვის საჭიროა, ასოციაციის წევრებმა მომართოთ ასოციაციის ოფისს შუამდგომლობისთვის.
ორ სპეციალიზაციაში დამოუკიდებელი საექიმო საქმიანობის სერტიფიკატი აქვს, არ მუშაობს ერთ-ერთში, საჭიროა თუ არა ორივეს ქულების დაგროვება?
ქულების დაგროვება ევალება იმ სპეციალობაში, რომელშიც მუშაობს.
ვისაც ახალი აღებული აქვს სერტიფიკატი, რამდენ ხანში უნდა დაიწყოს ქულების შეგროვება?
ინფორმაცია ზუსტდება ჯანდაცვის სამინისტროში. გადაწყვეტილების მიღებისთანავე ინფორმაციას გაავრცელებს საქართველოს სტომატოლოგთა ასოციაცია
როგორ მოხდება საზღვარგარეთ გავლილი კურსების აღიარება?
საქართველოში აღიარდება საზღვარგარეთ გავლილიკურსები, თუ ისინი აკრედიტებულია იმ ქვეყნის შესაბამისი მააკრედიტებელი ორგანოების მიერ.
ქვეყნების ჩამონათვალი, რომელთა შესაბამისი ორგანოების მიერ აკრედიტებული უსგ აქტივობები/მიმწოდებლები აღიარებულია საქართველოში:
ა) ევროკავშირის ქვეყნები: ბელგია, გერმანია, იტალია, ლუქსემბურგი, ნიდერლანდები, საფრანგეთი, გაერთიანებული სამეფო, დანია, ირლანდია, საბერძნეთი, პორტუგალია, ესპანეთი, ავსტრია, ფინეთი, შვედეთი, ესტონეთი, კვიპროსი, ლატვია, ლიტვა, მალტა, პოლონეთი, სლოვაკეთი, სლოვენია, უნგრეთი, ჩეხეთი, ბულგარეთი, რუმინეთი, ხორვატია;
ბ) ავსტრალია;
გ) კანადა;
დ) ისლანდია;
ე) ისრაელი;
ვ) იაპონია;
ზ) სამხრეთი კორეა;
თ) ახალი ზელანდია;
ი) ნორვეგია;
კ) შვეიცარია;
ლ) ამერიკის შეერთებული შტატები;
მ) ლიხტენშტეინი;
ნ) სამხრეთი აფრიკა.
პირის ღრუს ქირურგიულ სტომატოლოგიაში დაგროვებული ქულები სად ითვლება? ყბა-სახის ქირურგიაში?
საექიმო სპეციალობათა, მომიჯნავე საექიმო სპეციალობათა და სუბსპეციალობების შესაბამისი სპეციალობების ნუსხის განსაზღვრის შესახებ საქართველოს ნორმატიული დოკუმენტებით, პირის ღრუს ქირურგიული სტომატოლოგია გახლავთ თერაპიული სტომატოლოგიისა და ორთოპედიული სტომატოლოგიის სუბსპეციალობა, შესაბამისად, პირის ღრუს ქირურგიის მიმართულებით დაგროვებული უპგ ქულები ჩაეთვლება ამ ორ სპეციალობას.
თუ ორთოპედ-სტომატოლოგს აქვს დამატებით პირის ღრუს ქირურგიის სპეციალიზაცია როგორ მოაგროვოს ქულები პირის ღრუს ქირურგიაში?
სუბსპეციალობებში (დამატებით სპეციალობებში) უპგ ქულების მოგროვების ვალდებულება განსაზღვრული არ არის. დღეს საქართველოში გვაქვს სტომატოლოგიური მიმართულების 4 დამოუკიდებელი საექიმო სპეციალობა: თერაპიული სტომატოლოგია, ორთოპედიული სტომატოლოგია, ორთოდონტია და ყბა-სახის ქირურგია.
უნივერსიტეტებში ლექტორებად დასაქმებულ სტომატოლოგებს თუ მიენიჭებათ ქულები? რა პრინციპით?
ჩვენი კანონმდებლობის შესაბამისად, არსებობს უსგ-ის შემდეგი ფორმები: დასწრებული, დაუსწრებელი და სამეცნიერო. უსგ-ის სამეცნიერო ფორმებს მიეკუთვნება მონოგრაფიის, სახელმძღვანელოს ან კლინიკური რეკომენდაციის (გაიდლაინი)/კლინიკური სტანდარტის (პროტოკოლი) გამოქვეყნება და/ან მომზადება/აღიარება; საერთაშორისო რეფერირებად ჟურნალებში სამეცნიერო ნაშრომის/ სისტემური მიმოხილვის მომზადება/გამოქვეყნება.
შესაბამისად, აკადემიურ პერსონალს, რომელიც ჩართულია ზემოაღნიშნულ ფორმის სამეცნიერო აქტივობებში, მიენიჭებათ უპგ ქულები შემდეგი განაწილებით:
- მონოგრაფიის, სახელმძღვანელოს მომზადება/გამოცემა – არაუმეტეს 24 უპგ ქულა;
- კლინიკური რეკომენდაციის (გაიდლაინი)/კლინიკური სტანდარტის (პროტოკოლი) მომზადება/აღიარება – არაუმეტეს 12 უპგ ქულა;
- საერთაშორისო რეფერირებად ჟურნალებში სამეცნიერო ნაშრომის და/ან სასწავლო მასალის გამოქვეყნება:
- ჟურნალის იმპაქტ-ფაქტორი 0:
პირველი ავტორი – 2 უპგ ქულა (არაუმეტეს);
სხვა ავტორები – 1 უპგ ქულა (არაუმეტეს).
- ჟურნალის იმპაქტ-ფაქტორი ≤3:
პირველი ავტორი – 4 უპგ ქულა (არაუმეტეს);
სხვა ავტორები – 2 უპგ ქულა (არაუმეტეს).
- ჟურნალის იმპაქტ-ფაქტორი ≤6:
პირველი ავტორი – 8 უპგ ქულა (არაუმეტეს);
სხვა ავტორები – 4 უპგ ქულა (არაუმეტეს).
- ჟურნალის იმპაქტ-ფაქტორი 6-ზე მეტი:
პირველი ავტორი – 12 უპგ ქულა (არაუმეტეს);
სხვა ავტორები – 6 უპგ ქულა (არაუმეტეს).
- საერთაშორისო რეფერირებად ჟურნალებში სამეცნიერო ნაშრომის და/ან სასწავლო მასალის მიმოხილვის გამოქვეყნება:
- ჟურნალის იმპაქტ-ფაქტორი 0 – 1 უპგ ქულა (არაუმეტეს);
- ჟურნალის იმპაქტ-ფაქტორი ≤3 – 3 უპგ ქულა (არაუმეტეს);
- ჟურნალის იმპაქტ-ფაქტორი ≤6 – 6 უპგ ქულა (არაუმეტეს);
- ჟურნალის იმპაქტ-ფაქტორი 6-ზე მეტი – 10 უპგ ქულა (არაუმეტეს).
- დიპლომისშემდგომი განათლების (პროფესიული მზადების) სარეზიდენტო პროგრამის ავტორს (ავტორთა ჯგუფს) სარეზიდენტო პროგრამის აკრედიტაციისას ენიჭება I ტიპის 12 უპგ ქულა (არაუმეტეს).
