საქართველოს სტომატოლოგთა ასოციაცია (GSA) გაცნობებთ ბირთვული და რადიაციული უსაფრთხოების სფეროში განხორციელებული მნიშვნელოვანი საკანონმდებლო ცვლილების შესახებ. 2026 წლის 1 იანვრიდან ძალაში შევიდა საქართველოს მთავრობის №525 დადგენილება (2025 წლის 3 დეკემბერი), რომლის საფუძველზეც ავტორიზაციის სისტემაში ახალი მექანიზმი – რეგისტრაცია – დაინერგა.
რა იცვლება სტომატოლოგიური კლინიკებისთვის?
აქამდე დენტალური და ინტრაორალური რენტგენოდიაგნოსტიკური მოწყობილობების გამოყენება საჭიროებდა ლიცენზიას. ახალი რეგულაციით, აღნიშნული საქმიანობა გადავიდა რეგისტრაციის კატეგორიაში.
რეგისტრაცია − ადმინისტრაციული წარმოების ფარგლებში მარეგულირებელი ორგანოს მიერ პირისათვის მინიჭებული ბირთვული და რადიაციული საქმიანობის განხორციელების უფლებაა, რომელიც უფრო მარტივ პროცედურას გულისხმობს.
გარდამავალი პერიოდი და ვალდებულებები:
- 2026 წლის 31 დეკემბრამდე ყველა სტომატოლოგიურმა დაწესებულებამ უნდა უზრუნველყოს არსებული ლიცენზიის რეგისტრაციით შეცვლა.
- კლინიკებმა უნდა მიმართონ თავიანთ პარტნიორ ორგანიზაციებს, რომლებიც უწევენ ტექნიკურ მომსახურებას (დოზიმეტრული კონტროლი, რ/დანადგარის ხარისხის კონტროლი და სხვა.), რათა დროულად მომზადდეს სარეგისტრაციო დოკუმენტაცია.
უნდა განიმარტოს, რომ აღნიშნული ცვლილებები არ ეხება ექსტრაორალურ რენტგენოდიაგნოსტიკურ დანადგარებს. პროცესის კანონმდებლობის მოთხოვნებთან შესაბამისობაში მოსაყვანად დაუკავშირდით თქვენს პარტნიორ ორგანიზაციებს.
